அதிமுக முதல்வர் வேட்பாளரானார் இபிஎஸ்..! முடிவுக்கு வந்த சஸ்பென்ஸ்
சென்னை: 2021ம் ஆண்டு சட்டசபை தேர்தலுக்கான அதிமுக முதல்வர் வேட்பாளராக எடப்பாடி பழனிசாமி அறிவிக்கப்பட்டுள்ளார்.
சென்னை, ராயப்பேட்டையில் உள்ள கட்சி தலைமை அலுவலகத்தில் அ.தி.மு.க.வின் ஒருங்கிணைப்பாளரும், துணை முதல்வருமான ஓ.பன்னீர்செல்வம் மற்றும் இணை ஒருங்கிணைப்பாளரும், தமிழக முதல்வருமான எடப்பாடி பழனிசாமி கூட்டாக செய்தியாளர்களை சந்தித்தனர்.
அப்போது அ.தி.மு.க வழிகாட்டுதல் குழுவை முதல்வர் பழனிசாமி அறிவித்தார். 11 பேர் கொண்ட வழிகாட்டுதல் குழு அமைக்கப்பட்டுள்ளது. குழுவில் திண்டுக்கல் சீனிவாசன், காமராஜ், சி.வி.சண்முகம், ஜெயக்குமார், தங்கமணி, எஸ்.பி.வேலுமணி, ஜே.சி.டி.பிரபாகரன், மனோஜ் பாண்டியன், முன்னாள் அமைச்சர் மோகன, கோபாலகிருஷ்ணன், மாணிக்கம் உள்ளிட்டோர் இடம் பெற்றுள்ளனர்.
தொடர்ந்து பேசிய துணை முதல்வர் ஓ.பன்னீர்செல்வம், அ.தி.மு.க.வின் முதல்வர் வேட்பாளராக எடப்பாடி பழனிச்சாமி என்று அதிகாரப்பூர்வமாக அறிவித்தார். முதல்வர் வேட்பாளர் பெயர் அறிவிக்கப்பட்டதை அடுத்து, கட்சியின் தொண்டர்கள் ஆட்டம், பாட்டத்துடன் உற்சாகமாக கொண்டாடினர்.
