ஹேஷ்டாக் டுவிட்டரில் ட்ரெண்டிங் ஆன #ஹிந்தி_தெரியாது_போடா…!
சென்னை: #ஹிந்தி_தெரியாது_போடா என்ற ஹேஷ்டாக் டுவிட்டரில் ட்ரெண்டிங் ஆகி தமிழகத்தில் முதலிடத்தில் உள்ளது.
1965ம் ஆண்டு தமிழகத்தில் நடைபெற்ற இந்தி எதிர்ப்பு போராட்டங்களை அவ்வளவு எளிதாக யாரும் கடந்து சென்றுவிட முடியாது. திமுகவின் இந்த போராட்டமே அக்கட்சியை ஆட்சியில் அமரவும் வைத்தது. இப்போது அதே போன்ற ஒரு எதிர்ப்பு நிலை தமிழகத்தில் மீண்டும் எழ ஆரம்பித்து இருக்கிறது என்று சொல்லலாம்.
கனிமொழிக்கு விமான நிலையத்தில் நடந்தது, திரையுலக இயக்குநர் வெற்றிமாறன் இந்தி தெரியாமல் அவமானப்படுத்தப்பட்டது என்ற பல விஷயங்கள் விவாதம் ஆக்கப்பட்டது.
2 வாரங்களுக்கு முன்பு ஆயுஷ் அமைச்சகம் நடத்திய மருத்துவர்கள் கருத்தரங்கில் இந்தி தெரியாதவர்கள் வெளியே செல்லலாம் என்று கூறப்பட்டது பெரும் கொந்தளிப்பை ஏற்படுத்தியது.
இதற்கிடையே, பிரபல இசையமைப்பாளர் யுவன் ஷங்கர் ராஜா தனது டுவிட்டர் பக்கத்தில், I am a தமிழ் பேசும் indian என்ற வாசகம் அமைந்துள்ள டி சர்ட் அணிந்த போட்டோவை பகிர்ந்திருந்தார். அவருடன் அருகில் இருக்கும் நடிகர் மெட்ரோ ஹீரோ ஷிரிஷ், இந்தி தெரியாது poda என்ற டி சர்ட்டை அணிந்திருக்கிறார்.
அவரின் யுவன் ஷங்கர் ராஜா டுவிட் தற்போது இணையதளத்தில் பெரும் வைரலாகியுள்ளது. இதனைபோன்று, இந்திக்கு திணிப்புக்கு எதிராக பலரும் I am a தமிழ் பேசும் indian, இந்தி தெரியாது poda என்ற வாசகம் அமைந்துள்ள டி - சர்ட் அணிந்த புகைப்படத்தை பகிர்ந்து வருகின்றனர்.
இந் நிலையில், #ஹிந்தி_தெரியாது_போடா என்ற ஹேஷ்டாக் டுவிட்டரில் ட்ரெண்டிங் ஆகி தமிழகத்தில் முதலிடத்தில் இருக்கிறது. இந்தியளவில் டுவிட்டர் டிரெண்டிங்கில் 4வது இடத்தில் உள்ளது. இதனைபோன்று #Tamil என்ற ஹேஷ்டாக் டுவிட்டரில் ட்ரெண்ட் ஆகி வருகிறது.
