மோடி ஜி…! இதை செஞ்சு கொடுங்க… ஸ்டாலினின் அடுத்த சர்ப்ரைஸ்
சென்னை: சென்னையில் ஆசிய கடற்கரை விளையாட்டுப் போட்டிகளை நடத்த தேவையான நடவடிக்கைகளை எடுக்குமாறு பிரதமர் மோடிக்கு முதல்வர் ஸ்டாலின் கோரிக்கை விடுத்துள்ளார்.
சென்னையில் சர்வதேச செஸ் ஒலிம்பியாட் துவக்க விழா பிரம்மாண்டமாக நடந்து அனைவர் கவனத்தையும் ஈர்த்தது. இந்த செஸ் தொடர் மீது முதல்வர் ஸ்டாலின் காட்டிய ஆர்வத்தையும், ஏற்பாடுகளையும் பிரதமர் மோடி வெகுவாக பாராட்டி சென்றார்.
இந் நிலையில், பிரதமர் மோடிக்கு கோரிக்கை கடிதம் ஒன்றை முதல்வர் ஸ்டாலின் எழுதி உள்ளார். இது தொடர்பாக அவர் எழுதியுள்ள கடிதத்தின் விவரம் வருமாறு:
சென்னையில் நடைபெற்ற 44வது சர்வதேச சதுரங்க ஒலிம்பியாட் தொடக்க விழாவில் கலந்து கொண்டமைக்கும், இவ்விளையாட்டுப் போட்டிகளை தமிழ்நாட்டில் நடத்துவதற்குத் தேவையான அனைத்து உதவிகளை செய்தமைக்கும் தனது நன்றியை பிரதமருக்குத் தெரிவித்துள்ளார்.
இந்தியாவில் விளையாட்டுகளை ஊக்குவிப்பதில் இந்தியப் பிரதமர் காட்டிவரும் ஆர்வத்தை தனது கடிதத்தில் குறிப்பிட்டுள்ள முதலமைச்சர், சென்னையில் ஆசிய கடற்கரை விளையாட்டுப் போட்டிகளை நடத்துவதுவதற்குரிய ஒத்துழைப்பை நல்குமாறு கேட்டுக் கொண்டுள்ளார்.
தமிழ்நாடு அரசின் வேண்டுகோளையேற்று, 2024 ஜனவரியில் ஆசிய கடற்கரை விளையாட்டுப் போட்டிகளை தமிழ்நாட்டில் நடத்துவதற்கு, 6- 5- 2022 அன்று தாஷ்கண்டில் நடைபெற்ற ஆசிய ஒலிம்பிக் கவுன்சில் நிர்வாகக் குழுக் கூட்டத்தில் கொள்கை அளவில் ஏற்றுக் கொண்டுள்ளதைச் சுட்டிக் காட்டியுள்ள முதலமைச்சர், இவ்விளையாட்டுப் போட்டிகளை நடத்துவதற்குத் தேவையான உத்தரவாதங்களை இளைஞர் விவகாரங்கள் மற்றும் விளையாட்டு அமைச்சகம் விரைவில் வழங்கிட வேண்டியுள்ளதாகக் குறிப்பிட்டுள்ளார்.
ஏற்கெனவே மத்திய தகவல் மற்றும் ஒலிபரப்பு, இளைஞர் விவகாரங்கள் மற்றும் விளையாட்டுத் துறை அமைச்சருக்கு இதுதொடர்பாக 23- 5- 2022 அன்று கடிதம் எழுதியுள்ளதாகவும், செப்டம்பர் 2022 இறுதிக்குள் ஆசிய ஒலிம்பிக் கவுன்சிலுக்கு இந்த உத்தரவாதங்கள் வழங்கப்பட வேண்டி உள்ளதால், இளைஞர் விவகாரங்கள் மற்றும் விளையாட்டு அமைச்சகம் விரைவில் அதனை வழங்கிட உரிய நடவடிக்கை எடுக்குமாறு முதல்வர் பிரதமரை கேட்டுக் கொண்டுள்ளார் என்று அந்த கடிதத்தில் கூறப்பட்டுள்ளது.
