வலிமை பட ‘அப்டேட்டால்’ வலி…! ரசிகர்களால் கோபம்.. அறிக்கை விட்ட அஜித்…!
சென்னை: வலிமை படம் குறித்த அப்டேட் உரிய நேரத்தில் வரும் என்றும், ரசிகர்கள் அமைதி காக்க வேண்டும் என்று நடிகர் அஜித் கூறி உள்ளார்.
போனி கபூர் தயாரிப்பில் நடிகர் அஜித் இப்போது வலிமை என்ற படத்தில் நடித்து வருகிறார். பெரும் எதிர்பார்ப்பை ஏற்படுத்தி உள்ள இந்த படம் குறித்து அப்டேட் தகவல்கள் குறித்து அஜித் ரசிகர்கள் ஆளாளுக்கு கருத்துகளை கூறி இருந்தனர்.
இன்னும் சில ரசிகர்கள் பிரதமர் மோடி, முதலமைச்சர் எடப்பாடி பழனிசாமி ஆகியோருக்கு டுவிட்டரில் டேக் செய்தனர். இன்னும் சிலரோ சென்னை சேப்பாக்கத்தில் இந்திய அணிக்கு எதிரான டெஸ்ட் போட்டியில் பீல்டிங் செய்து கொண்டிருந்த மொயின் அலியிடம் வலிமை பட அப்டேட் குறித்து சொல்லுங்கள் என்றும் கேட்டு கிண்டல் அடித்தனர்.
ரசிகர்களின் இந்த விளையாட்டுத்தனமான செய்கைகள் கடும் அதிருப்தியை ஏற்படுத்திய நிலையில், ரசிகர்களின் இத்தகைய நடவடிக்கைகள் தமக்கு வருத்தத்தை தருவதாக நடிகர் அஜித் கூறி உள்ளார். இது குறித்து அவர் தமது மேலாளர் சுரேஷ் சந்திரா மூலமாக அறிக்கை ஒன்றை அவர் வெளியிட்டு உள்ளார்.
அந்த அறிக்கையில் அவர் கூறி உள்ளதாவது: என் மீதும் என் படங்களின் மீதும் அபரிதமான அன்புக் கொண்டு இருக்கும் எதையும் எதிர்பாராத அன்பு செலுத்தும் என் உண்மையான ரசிகர்களுக்கும், மக்களுக்கும் என் மனமார்ந்த வணக்கம். கடந்த சில நாட்களாக என் ரசிகர்கள் என்ற பெயரில் நான் நடித்து இருக்கும் “வலிமை” சம்பந்தப்பட்ட updates கேட்டு அரசு, அரசியல் விளையாட்டு மற்றும் பல்வேறு இடங்களில் சிலர் செய்து வரும் செயல்கள் என்னை வருத்தமுற செய்கிறது.
முன்னரே அறிவித்தபடி படம் குறித்த செய்திகள் உரிய நேரத்தில் வரும். அதற்கான காலத்தை, நேரத்தை நான் தயாரிப்பாளருடன் ஒருங்கிணைந்து நிர்ணயம் செய்வேன். அதுவரை பொறுமையுடன் காத்திருக்கவும். உங்களுக்கு சினிமா ஒரு பொழுது போக்கு மட்டுமே, எனக்கு சினிமா ஒரு தொழில். நான் எடுக்கும் முடிவுகள் என் தொழில் மற்றும், சமூக நலன் சார்ந்தவை. நம் செயல்களே சமூகத்தில் நம் மீது உள்ள மரியாதையை கூட்டும்.
இதை மனதில் கொண்டு ரசிகர்கள் பொது வெளியிலும், சமூக வலைத் தளங்களிலும் கண்ணியத்தையும், கட்டுப்பாட்டையும் கடைப்பிடிக்க வேண்டும் என கேட்டுக் கொள்கிறேன் என் மேல் உண்மையான அன்பு கொண்டவர்கள் இதை உணர்ந்து செயல்படுவார்கள் என நம்புகிறேன் என்று நடிகர் அஜித் குறிப்பிட்டுள்ளார்.
